Sajarah Sumedang Jaman Pangeran Kornel Nepi Ka Jaman Pangeran Mekah (5)

Dina bulan Mei 1871 Bupati Limbangan Raden Adipati Soerianata Koesoemah pupus, diganti ku putra pameget cikal (Onder kolektor Garut) Raden Rangga Wiranagara tea, ku bisluit tanggal 11 Juni 1871 diangkatna kana Bupati Limbangan nampi gelaran Tumenggung, jujuluk Raden Tumenggung Wiranagara.

Dina bulan September 1874 Bupati Bandung Raden Adipati Wiranata Koesoemah R.O.N.I pupus, sarta ku bisluit tanggal 28 October 1874 diangkat kana Regent Bandung ngagentos anu wapat tea saderekna, Patih Bandung Demang Koesoemadilaga, nampi gelaran Tumenggung, jujuluk Raden Tumenggung Koesoemadilaga. Pupusna di Bandung, gelarana Adipati, Bintang Emas (Groote Gouden Ster – G.G.S.) dina tanggal 7 April 1893, digentos kana Bupati Bandung ku Patih-apdeling Sukapura-kolot (Mangunreja) Raden Aria Martanagara, asal Patih Sumedang, ngagentos saderek misan, nu ka selir ka Sumedang jumeneng Bupati Raden Rangga Soeria Atmadja (Pangeran Mekah).

Raden Aria Martanagara diangkat kana Bupati Bandung ku Gubernur Walanda 27 Juni 1893 dipansiun ku G.B. tanggal 14 October 1918, ganjaran-ganjaran anu katampi :  Bintang Emas G.G.S. 27 Augustus 1900; Bintang Siam: S.K.O.; K.B.15 Maart 1902; Aria: G.B. 15 Augustus 1903; Adipati: G.B.19 Augustus 1906; Songsong kuning (Geele Songsong-G.S) – G.B. : 26 Augustus 1909. Pupus di Sumedang tanggal 2 September 1926.

Bupati Sukapura dilirenkeun, katarik kana perkawis nu jadi putra Wadana Mandala Raden Danoeningrat, kalepatan ku sabab gara-gara miwarang ngala kai ti leuweung tutupan, pikeun ngadangdosan bumi kalangenan nu jadi rama di Kertasari (G.B. 28 October 1875).

Ku Gouvernement Belanda tanggal 29 November 1875 diangkat kana Bupati Sukapura, saderekna (patih Sukapura) Raden Demang Danoe Koesoemah, nampi gelaran Tumenggung jujuluk Raden Tumenggung Danoe koesoemah. Kana Patih Sukapura diangkat Wadana Ciawi Raden Soeria Atmadjaputra Bupati Sumedang, sabisluit sareng angkatan Bupatina.

Ku bisluit tanggal 18 December 1877 jeung 28 April 1878 diidinan gentos jenengan dua regen, nyaeta Bupati Limbangan jujuluk Raden Tumenggung Aria Wiratanoe Datar, ngalap jenengan karuhun para Bupati Cianjur, jeung Bupati Sukapura jujuluk Raden Tumenggung Wira Adiningrat.

Ku bisluit tanggal 30 Augustus 1878 Patih Garut Raden Demang Adiwidjaja dipansiun, saderek garwa patih Sukapura di Manonjaya Raden Soeria Atmadja. Mantenna putra Pangeran Sumedang,  dibabarkeun di Sumedang dina tanggal 11 Januari 1851, keur murangkalih kakasihna Aom Sadeli, ku G.B. tanggal 13 Maart 1879 nampi gelaran Rangga. Ku Gouvernement Belanda tanggal 23 October 1880 dialihkeun kana Patih Aapdeling Sukapura Heubeul, dayeuhna Mangunredja, ngagentos Raden Demang Soeria Nataningrat (nu dialihkeun kana Bupati Lebak, dayeuhna Rangkasbitung, pupus taun 1908, putra Hoofd Panghulu Agung Limbangan Raden Haji Moehamad Moesa).

Ku Gouvernemet Belanda 4 Maret 1908 Raden Adipati Soeria Nataningrat digentos ku putra Raden Adipati Aria Soeriadipoetra, nu ku Governemet Belanda. tanggal 16 Maart 1925 pindah ka sanes wargi, margi mantenna teu puputra.

Waktu timbul bentang kukus pucuk tilu dina poe Jumaah tanggal 22 September 1882, Pangeran Soeria Koesoema Adinata Bupati Sumedang geus cunduk ka waktu datang mangsa nepi kana dihin pinasti tilar dunya, pupus di padaleman Sumedang. Tina sabab sugih putra, sugih dunya brana, nelahna ogenepi ka ayeuna Pangeran Sugih. Nu ngaluuhan waktu pupus, putra mantu kaponakan Patih Sumedang Raden Rangga Martanagara, diangkat kana Patih tina Wadana Kota Sumedang ngagentos patih Sumedang Raden Demang Satjadipradja nu ku bisluit tanggal 9 Februari 1884, mundut pansiun teras bumen-bumen di kampung Sayang Sumedang. Eta teh eyang R.T.A. Hassan Soemadipradja Bupati Batawi ayeuna.

Nu kaselir jumeneng Bupati Sumedang (bisluit Gupernemen tanggal 30 Desember 1882) Raden Rangga Soeria Atmadja Patih-apdeling Sukapurakolot lain putra pangbarepna Pangeran Soeria Koesoema Adinata, da putra cikal mah Patih afdeling Tasikmalaya Raden Demang Somanagara ku Pamarentah Agung teu kamanah.

Moal panjang-panjang dipicatur, kumaha Bupati Sumedang anyar ngolahna nagara, marentah ka somah-somah, makihikeun abdi-abdi, kurupa-rupa ganjaran ti Pamarentah nu ku mantenna katampi oge, nu bakal ditataan dihandap ieu, geus kanyahoan gede jasana pikeun abdi-abdi urang Sumedang jeung Gupernemen Hindia.

Sing saha-saha nu hayang nyaho kana jasa Pangeran Aria Soeria Atmadja, nu nelah Pangeran Sampurna Mekah, geura baca bae Sri Pustaka no.6 bulan Juni 1922 kaluaran Bale Pustaka, kaca 135,nu nyaritakeun waktu muka “Lingga Pangeran Aria Soeria Atmadja marhum” ku tuan Besar Gupernur Jendral Mr. D. Fock dina poe Salasa tanggal 25 April 1922, nu nyebat ka Pangeran Aria Soeria Atmadja “Pangeran Sampurna”, seratan tuan H. De Beer, inspektur Landbouw marhum, mitra Pangeran.

Ganjaran ti pamarentah Agung Hindia, nu katampi kumantenna, tawis ageng jasana ka rahayat sareng ka Gupernemen, ieu :

• Bisluit Gupernemen (G.b.) tanggal 21 Augustus 1891 Bintangmas Ageng (G.G.S.).

• G.b. tanggal 31 Augustus 1898 nampi gelaran Adipati, jujuluk Radem Adipati Soeria Atmadja

• Ku Firman Sri Maha Raja Ratu Nederlan (K.b.) tanggal 27 Augustus 1903: Officier in de Orde van Oranje Nassau.

• Ku G.b. tanggal 26 Augustus 1905 nampi Pajeung Kuning (Gele-songsong)

• Ku G.b. tanggal 29 Augustus 1906 nampi gelaran Aria

• Ku G.b. tanggal 26 Augustus 1910 nampi gelaran Pangeran nganggo Pajeng Gilap (predicaat Pangeran met de vergulde pajong)

• Ku K.b. tanggal 17 September 1918 panutupan nampi Bintang agung: Ridder in de Orde van Nederlandschen Leeuw.

Bupati Sumedang Raden Adipati Soeria Atmadja (kanan) beserta keluarga 1899

Tina parantos ngaros sepuh, pangeran Aria Soeria Atmadja mundut lugay tina ngasta kabupatian Sumedang, ku Pamarentah Agung kaidinan sarta teras dipansiun ku G.b. tanggal 17 April 1919, ngalih bumen-bumen di Sindangtaman, ti dinya teu lami tanggal 24 April 1921 (15 Rewah 1339), nohonan rukun Islam nu kalima, mantenna angkat jarah ka tanah Suci, munggah haji, ngan sasumpingna ka Mekah lajeng wapat, nyakitu deui garwa sareng saderek istri anu dicandak anu dicandak ka Mekah, malah badal-badal nu ngiring pada tilar dunya, teu mulih deui ka bali geusan ngajadi, nya ka dayeuh Sumedang, sampurna di tanah suci.

De Regent van Soemedang, Pangeran Aria Soeria Atmadja, met zijn gezin, Europese kinderen en enkele bediendes op de trap voor zijn huis. 1915-1921 M

Salugayna Pangeran Soeria Atmadja, digentos ku saderek sarama, lantaran teu kagungan putra pamegat, mung putra istri hiji sareng putu pameget pupus ti payun, gentosna tea (bisluit jeung pansiun tanggal 19 April 1919) rayi Pangeran nu nyepeng Wadana Palumbon Raden Koesoemadilaga.

Ganjaran ti Gouvernement anu katampi ku mantenna, nya ku G.b. 24 Augustus 1923 gelaran Aria.  Ku G.b. tanggal31 Augustus 1926 nampi gelaran Adipati.  Ku bisluit Gupernemen tanggal 24 Augustus 1931 nampi anugrah Songsong Kuning.  Ku G.b. tanggal 25 Augustus 1936 nampi ganjaran Bintang Emas Ageng (Groote Gouden Ster), ari dina tanggal 30 Januari 1937 seseren damel ka putra kaponakan (bisluit Gupernemen tanggal 28 Januari 1937) tina Patih Krawang Raden Kandaroean Soeria Soemantri, diistrenan di Sumedang tanggal 6 Maart 1937. Duanana waktu nulis ieu karangan jumeneng keneh, kusabab eta moal maka dicaturkeun sajarahna.

Hayang nerangkeun heula, yen Kabupaten Sukabumi nu diadegkeun taun 1921, dibupatian ku saderek saibu-sarama Raden Adipati Aria Koesoemadilaga, tunggal putra Pangeran Soeria Koesoemah Adinata (pangeran Soegih) keneh, diangkatna Bupati Sukabumi ku G.b. tanggal 22 Augustus 1925 jujuluk Raden Tumenggung Soeria Nata Brata; G.b.tanggal 22 Augustus 1925 nampi gelaran Aria, G.b. tanggal 22 Augustus 1928 nampi gelaran Adipati.  Ku G.b.tanggal 2 Mei 1932 dipansiun, digentos kana Bupati Sukabumi ku putra saderek, tina Patih-warnen Bupati Sukabumi (bisluit Gupernemen tanggal 31 Mei 1933), nampi gelaran Aria (G.b. tanggal 25 Augustus 1936), jadi waktu nulis karangan ieu, jujuluk Raden Tumenggung Aria Soeria Danoeningrat.

T A M A T

------------------

SUMBER :

Karangan : Raden Asik Natanagara dina “Volksamanak Soenda” Tahun 1935