Sajarah Sumedang Jaman Pangeran Kornel Nepi Ka Jaman Pangeran Mekah (4)

Ieu panuhun para wargi Sukapura lila-lila kaemper-emper ka Bupati Limbangan Adipati Adiwidjaja, barang kauninga oge lajeng bae bendu sarta mundut Rd. Aria Danoeningrat jeung Rd. Haji Moehamad Salim tina pangkatna dilepas ka tuan Residen Priangan ku suratna tanggal 1 Mei 1829, nu dilampiran surat asal-usul Dalem Adipati Adiwidjaja pacantel kawargian jeung para bupati Limbangan anu asli jeung para Bupati anu ngasta Sumedang. Aya dua “daptar turunan Regent Sumedang” jeung “daptar turunan Regent Limbangan”. Eta sarsilah dina seratan Dalem Adipati Adiwidjaja Garut dina tanggal 1 Mei 1829 beunang dipake katrangan keur menerkeun sarsilah-sarsilah nu beunang nyieun anyar, tur nuduhkeun tedak Bupati Sumedang jeung Limbangan aya hak neruskeun talapakan karuhun di Garut.

Ku lantaran rekes, jeung ceuk beja kampung, Dalem Aria Danoeningrat kungsi dialihkeun ti Garut ka Sumedang, mulihna ka Sukapura dipapancenan melak tarum ku Nagara. Ari sabenerna mah, Dalem Aria Danoeningrat teh, ku lantaran rekes tea, ku Residen Priangan dialihkeun ka Banjar, sarta tetep ngagem Papatih-kumetir, nyepeng cutak-cutak pakidulan bawahan Sumedang nu asal ti kabupaten Sukapura nu diburak tea.

Sangalihna Raden Aria Danoeningrat ka Sumedang, digentoskana Papatih-kumetir ku putra Dalem Adipati Adiwidjaja pangbarepna Raden Aria Djanegara, tina Kapala-cutak Cikadu Tanjungsari, ti Sumedang dialihkeun ka Limbangan jadi Papatih rama ku anjeun.

Dina taun 1829 keneh, bulan Maart Bupati Bandung Raden Adipati Wiranata Koesoemah (Dalem Kaum) pupus. Ku surat tuan Residen Priangan O.C. Holmberg de Beckfeldt tanggal 7 Maart disuhunkeun pikeun gentosna putrana anu cikal Kapala-cutak Tarogong Raden Tumenggung Anggadiredja nu nembe mulihtina ngajaga karaman di Tasikmalaya sarta ku bisluit Gupernemen tanggal 27 Mei 1829 diangkat jadi Bupati Bandung, nampi gelaran Adipati jeung gentos jenengan Raden Adipati Wiranata Koesoemah (nelahna engke Dalem Karanganyar).

Pindah taun 1830 dina mimiti bulan Januari pisan, tuan Besar anyar (J. Van den Bosch) sumping ka Batawi, nampina pamarehtahan tituan Besar Kommissaris-generaal duGisignies dina tanggal 16 januari 1830, nya waktu ieu timbulna usul tangtung Pamarentah nu disebut “cultuurstelsel” (Aturan taneman) teh, sabab nya  ti harita Nagara ngumpulkeun duit ku ngamajukeun rupa-rupa taneman, babakuna kopi, tina laladangan pepelakan nu dijualan di pasar-pasar Eropa, nu nguntungkeun ka Gupernemen mangyuta-yuta rupia. Karaman pangeran Ario Diponegoro oge tumpesna dina taun 1830.

Dina mimiti taun 1831, Patih Sumedang Raden Demang Natanegara mundut liren, gentosna Biskal Sumedang (angkatan Mei 1824) Raden  Aria Soerialogawa putra Dalem talun ti raden Ayu Kamsiah, saderek Dalem Adipati Enoh Cianjur. Dina taun 1832 Patih Sumedang Raden Aria Soerialogawa nampi gelaran Tumenggung, jadi Raden Tumenggung Soeriadilaga.

Dina tanggal 9 September 1831 Bupati Limbangan Raden Adipati Adiwidjaja, putra Pangeran Kornel nu pangsepuhna di Garut, pupus sarta tug ka kiwari nelahna dalem Cipeujeuh. Nu ngagentos kana Bupati Limbangan putrana cikal Raden Aria Djanegara, Patih Limbangan, diangkatna ku bisluit resolutie tanggal 18 October 1831 nampi gelaran Tumenggung jadi Raden Tumenggung Koesoema Adiningrat.

Kana Patih Limbangan anu diangkat Kapala-cutak Pasanggrahan Raden Wiranagara putra Bupati Cianjur Adipati Wira Tanoe Datar (Dalem Enoh) nu kakasihna keur murangkalih Aom Abas, dikukut ku Pangeran Kornel.

Panuhun para wargi Sukapura ku resolutie 18 October 1831 dikabulkeun, Kabupaten Sukapura dihudangkeun deui sarta dijieun tina distrik-distrik anu diasupkeun ka wewengkon Limbangan nyaeta Batuwangi, Panyeredan, Taraju, Sukapura, Selacau, Parung, Karang jeung Nagara. Ieu 8 distrik di pakidulan diheuyeuk ku Bupati Sukapura pansiun nu ayeuna diangkat deui kana Regen Sukapura kaopat kalina, nu salamina liren jadi wakil regen Limbangan, kalawan tetep ngagem gelaran jeung jenengan nu ayeuna nya eta: Raden Tumenggung Wiradadaha, mantu Pangeran Kornel, caroge Raden Ajeng, tilas Dalem Kaum Bandung, ayeuna jenenganana Raden Ayoe Radjaningrat.

Dina taun 1832 di Krawang timbul barandal urang Tionghoa, nu maehan tuan Macklot, Amtenar Gupernemen nu keur dipapancenan mariksa leuweung-leuweung. Ieu barandal ditumpesna, bejana ku urut senapati Pangeran Ario Diponegoro, Pangeran Sentot Alibasah Prawiradirdja.

Ku bisluit 22 April 1833 Bupati Cianjur  Raden Adipati Prawiradiredja (Dalem Kaum) mundut liren lantaran teu damang, teras dipansiun, diganti ku putrana Raden Tumenggung Wiranagara, putra Dalem Adipati Enoh tea, anu kakasihna keur murangkalih Aom Abas, ngan teu kamanah.

Dina tanggal 14 Augustus 1833 tuan Residen Priangan unjukan ka tuan Besar, yen Bupati Sumedang, Raden Adipati Koesoemajoeda di Indihiang ngadak-ngadak pupus, ngaluga-lugakeun getih, nilarkeun putra pameget dua, nu nembe disepitan tilu bulan katukang. Nu cikal kakasihna Raden Ahmad, ana dilandi bada diberesihan: Raden Somanagara, ngan so diserat Soemanagara (Sumanagara). Nu burey jenenganana Raden  Moehamad (Muhamad) dilandi Raden Prawirakoesoema (Prawirakusuma) engkena gentos deui kakasihna, Raden Koesoemajoeda, ngalap jenengan rama. Putra pameget katilu Raden Moestapa (Mustapa), nalika ramana pupus teh, di lebet wewetengan keneh. Putra istri nu ditilar aya genep. Raden Soemanagara yuswana nembe 16 taun.

Ku surat tanggal 20 Augustus 1833 tuan Residen nyanggakeun rupa-rupa panuhun nu ku Pamarentah Agung digugu ku resolutie tanggal 10 September 1833, nyaeta dina :

Artikel 1. Bupati Limbangan Raden Tumenggung Koesoema Adiningrat dialihkeun ka Sumedang, ngagentos rama-paman kawuwuh mertua Bupati Sumedang nu nembe wapat Adipati Koesoemajoeda, jumeneng Bupati Sumedang jujuluk Raden Adipati Koesoemadinata, atuh jadi ngalihna ka Sumedang teh nampi gelaran Adipati jeung gentos jenengan.  Gentosna di Limbangan, Raden Demang Wiranagara, Patih Garut, nu kapernah mantu Bupati nu dialihkeun ka Sumedang tea, garwaan ka Raden Ayu Radjapoernama (Rajapurnama), diangkat kana Regen Limbangan nampi gelaran Tumenggung, gentos jenengan jadi Raden Tumenggung Adiwidjaja, ngalap jenengan mertua-eyang. Nurutkeun artikel 1. bisluit eta keneh diangkat kana Papatih-polisi Limbangan, Hup-kumetir kopi taneman nagara, raden Demang Soerianagara, putra Dalem Talun Adipati Soerialaga II ti Raden Ayu Radjanagara (Rajanagara), putra Pangeran Kornel, nampi gelaran Aria, jadi Raden Aria Soerianagara.

Artikel 2. Raden Soemanagara putra Bupati marhum Raden Adipati Koesoemajoeda, dicalonkeun bakal jadi Bupati Sumedang, upama nu nembe diangkat Regen Sumedang Raden Adipati Koesoemadinata wapat.

Artikel 3. Kabupaten Sukapura, nu diadegkeun deui ku resolutie 18 October 1831 dayeuhna nu dipindahkeun ka sisi walungan Citanduy dingaranan Harjawinangun, diatur deui wewengkonna digedean ku distrik-distrik nu katarik ka Sumedang, dipulangkeun, iwal ti distrik Cidamar tetep ka Cianjur. Distrik-distrik anu kawengku ku Sukapura teh, nya eta: Panyeredan, Selacau, Parung, Karang, Nagara, Batuwangi, Taraju, Kandangwesi, Pasirpanjang, Janggala, Kewasen, Cikembulan jeung Mandala.

Artikel 4. Bupati Sukapura Raden Tumenggung Wiradadaha diganjar gelaran Adipati. 

Bupati Sumedang Raden Adipati Koesoemadinata, nu kakara diangkat, kacida ririwitna nepi ka padamelanana dina ngaheuyeuk nagara kudu dijalankeun ku Papatih-polisi Sumedang Raden Tumenggung Soeriadilaga, ramana Dalem Talun Adipati Soerialaga II, Bupati pansiun Bogor-Karawang-Sukapura ku resolutie 13 Juli 1834 nampi tambahan pansiun artos f.50,- jadi saban bulan nampi pansiun rupa arta f.150,-

Ku surat tanggal 29 Juli 1834 tuan Residen Priangan unjukan ka tuan Besar, yen Bupati Sumedang Raden Adipati Koesoemadinata dina tanggal 28 Juli 1834 pukul 4 sore parantos wapat. Di Sumedang, katelahna nepika ayeuna : “Dalem Leutik”.

Bupati Limbangan Raden Tumenggung Adiwijaja kaidinan gentos jenengan ku bisluit resolutie 18 Augustus 1834 jadi Raden Tumenggung Djaja Ningrat (Jaya Ningrat).

Ku surat tanggal 2 September 1834 Patih Garut Raden Aria Soemanagara dialihkeun kana Patih Sumedang, sarta kana Patih Limbangan diangkat Raden Adiwidjaja putra marhum Adipati Adiwidjaja (Dalem Cipeujeuh) tina Hup-kumetir kopi Limbangan.

Ku panuhunna nu jadi rama Adipati Prawiradiredja, Bupati Cianjur warnen, Raden Tumenggung Wiranagara dilungsurkeun tina kalungguhan digentos ku Bupati Cianjur nurutkeun resolutie 10 October 1834, ku saderek sarama tina Papatih-polisi Raden Rangga Wiradiredja, jumeneng Regen jujuluk Raden Tumenggung Wiradiredja, nu dina resolutie 28 November 1834 kaidinan gentos jenengan Raden Tumenggung Soeria Nata Ningrat.

Nohonan nu dijangjikeun dina artikel 2, resolutie 10 September 1833, diangkat kana Bupati Sumedang ku resolutie 20 October 1834 dina artikel 1. Raden Soemanagara putra Bupati Sumedang marhum Raden Adipati Koesoemajoeda, kalawan nampi gelaran Tumenggung, jujuluk Raden Tumenggung Soemanagara, dijangjikeun dimana yuswa 21 taun bakal dipasrahan kabupatian jeung damelna, sabab yuswana ayeuna kakara 17 satengah taun, sarta ku artikel 2. ditetepkeun salila tacan manjing yuswa, padamelan kabupatian diwakilkeun ka Papatih-polisi Sumedang Raden Tumenggung Soeriadilaga, nu diangkat kana warnen-Regen Sumedang sarta dipatihan ku saderek sarama Raden Aria Soerianagara.

Bupati Sumedang anyar, sabab anom keneh pisan didamelkeun di kator karesidenan Cianjur, teras dibantukeun ka Bupati Bandung Adipati Wiranata Koesoemah (Dalem Karanganyar), ginahu sagala damel nu jadi Bupati tina bagbagan ngaheuyeuk nagara jeung tina bab taneman kopi, linggih di dayeuh Bandung nepi ka bulan September 1835, ti dinya mulih ka Sumedang calik di pakarangan Kaparek, ari Bupati-warnen ti padaleman ngalih ka bumi pakarangan Depok, Patih Raden Aria Soerianagara ka bumi di Cipada, gedong padaleman dikosongkeun bae.

Ku resolutie 17 December 1835 kapasrahan damel karegenan, diistrenan dina poean Lebaran tanggal 20 Januari 1836, Bupati-warnen Raden Tumenggung Soeriadilaga lajeng lugay tina damel, mundut liren sarta dipansiun nyandak tina hasil kopi Bupati aprekin saban bulan f.250,-. Teras mantenna ti bumi Depok ngalih bumen-bumen di kampung Sindangraja, nu matak nepi ka ayeuna nelah Dalem Sindangraja.

Ku resolutie 22 Maart 1836 dua priyayi Limbangan: Patih jeung Hupkumetir Limbangan: Raden Adiwidjaja jeung Raden Kanduruan Wiradimanggala, putra Onderegen Sukapura raden Tumenggung Danoeningrat diganjar gelaran demang jeung Rangga jujuluk Raden Demang Adiwidjaja jeung Raden Rangga Tanoewangsa.

Ku surat  Residen Priangan tanggal 6 Mei 1837 kaunjukkeun Bupati Sukapura Raden Adipati Wiradadaha pupus, diganti kana Regen ku saderekna Raden Tumenggung Danoeningrat, nu nampi gelaran ku akte tanggal 13 December 1831, diangkat kana Bupati Sukapura ku bisluit tanggal 15 Juni 1837, teras gentos jenengan ku bisluit tanggal 22 Mei 1840 jadi Raden Tumenggung Wira Tanoe Baja ngalap tedak Parakanmuncang jenengan ramana Bupati Sukapura (taun 1765/1770 – 1807) Adipati Wira Tanoebaja.

Dayeuh Sukapura Harjawinangun, diadegkeun taun 1831 ku bisluit tanggal 10 Januari 1839 (Staatblad no.2) diganti ngaranna jadi Manonjaya.

Tilu Bupati Priangan kaidinan ku bisluit 14 Augustus 1841 gentos jenengan nyaeta Bupati Limbangan asal jenengan Djaja Ningrat dilandi Raden Tumenggung Wira Tanoe Datar, ngalap jenengan rama (Dalem Enoh Cianjur). Bupati Cianjur tina jenengan Soeria Nata Ningrat ku ieu bisluit jadi Raden Tumenggung Aria Soeria Adiningrat. Nu katilu kaidinan gentos jenengan Bupati Sumedang asal ngalap jenengan tedak Limbangan wungkul Raden Tumenggung Soemanagara, didinan ku bisluit ieu nyandak jenengan para luluhur Sumedang dikantetkeun jeung Limbangan, nurutkeun serat tanggal 26 November 1840 jujuluk Raden Tumenggung Soeria Koesoemaadinata.

Ku bisluit Gupernemen tanggal 31 October 1850 dua Bupati nampi gelaran Adipati. Bupati Sumedang jujuluk Raden Adipati Soeria Koesoemaadinata, ari Bupati Cianjur ditambah ku mundut ganti jenengan deui, diidinan ku bisluit tanggal 11 Maart 1851 jujuluk: Raden Adipati Aria Koesoema  Ningrat.

Kapaksa malikan deui carita, sanajan lain sajarah Sumedang oge, tapi ku lantaran aya pacantelna jeung anu jadi Bupati Sumedang, perlu dicaritakeun, yen Bupati Sukapura Raden Tumenggung Wira Tanoe Baja dina tanggal 4 Januari 1844 pukul 8 peuting pupus sarta nurutkeun bisluit tanggal 2 Februari 1844 digentos ku putrana Hup-kumetir taneman kopi: Raden Rangga Tanoewangsa, diangkat kana Bupati Sukapura jujuluk : Raden Tumenggung Wira Tanoebaja (III), sabab geus tilu Bupati Sukapura ngagem ieu jenengan.

Dina tanggal 26 December 1845 tuan Asisten Residen Bandung, tuan W.A. Nagel ditandasa, dina waktu keu rkahuruan di Ciguriang ku paranakan Tionghoa mualap ngaran Munada. Lantaran nuboga dosa ku pulisi Bandung teu kapanggih, nu jadi Bupati jeung Hoofd-djaksa Bandung ku bisluit Gouvernement tanggal 27 Juli 1846 dilirenkeun sarta teu kaidinan lalinggih di Bandung. Nu jadi Bupati ngalih ka Cianjur, kalawan dipansiun sarebu rupia saban bulan, ari Hoofd-jaksa diiangkeun ka Surabaya, meunang kahirupan ti Pamarentah (onderstand) f.20,- sabulan.

Ku bisluit tanggal 27 Juli 1846 diangkat kana Bupati Bandung, Raden Rangga Kartanagara, putra Regent anu lugay, tina Hup-kumetir Cianjur, nampi gelaran Tumenggung, sarta kauntungan aprekin kopi sataun teu kenging langkung ti tilupuluh rebu rupia.  Dalem Adipati Wiranata Koesoemah (Wiranata Kooesoemah III) mertua Bupati Sumedang Adipati Soeria Koesoemah Dinata (Pangeran Soegih), rama garwana (Raden Ayu Sangkaningrat), linggihna di Cianjur teu lami, pupus di Bandung tanggal 28 Februari 1855, dipendem di Pasarean Karanganyar, nu matak nelahna Dalem Karanganyar.

Dina taun 1855 Patih Limbangan Raden Demang Adiwidjajaputra Adipati Adiwidjaja pupus, nya kitu deui Bupati Sukapura Raden Tumenggung Wira Tanoe Baja III dina tanggal 6 Juni 1855 wapat.

Ku bisluit tanggal 25 Augustus 1855 diangkat kana Bupati Sukapura Raden Wira Tanoe Wangsa, saderek bupati nu pupus, Hup-kumetir kopi Sukapura, nampi gelaran Tumenggung, jujuluk Raden Tumenggung Wira Tanoebaja IV. Ari nu diangkat kana patih Limbangan Raden Wiranagara putra Demang Adiwidjaja dilandi sarta nampi gelaran rangga (ku bisluit tanggal 12 December1855) jadi Raden Rangga Adiwidjaja.

Kabina-bina rahayat Sumedang aratoheunana, lantara kubisluit tanggal 10 October 1855 taneman Nagara jeung ngokolakeun tarum, nyieun nila dileungitkeun, somahan henteu kudu melak tarum jeung nila deui.

Ku bisluit 11 Maart 1864 Patih Sumedang Raden Aria Soerianagara dipansiun gantina Raden Rangga Somanagara tina Hup kumetir tanaman kopi, putra cikal Bupati Sumedang Pangeran Soeria Koesoemah Adinata (Pangeran Soegih) ti Nyi Raden Bodedar putra R. Haji Soeria Cianjur (R. Haji Djenal Asikin).

Dina seratna tanggal 29 December 1864 Regent Sumedang Adipati Soeria Koesoema Adinata unjukan ka Pamarentah Agung  nu jalan katuan Residen Priangan, yen surat-surat pusaka Bupati Sumedang dina taun 1837 ti padaleman dicandak ku Bupati warnen Raden Tumenggung Soeriadilaga ka bumina di pakarangan Sindangraja, lantaran kahuruan surat-surat pusaka Buparti Sumedang leungit, kabeh kaduruk. Bupati Sumedang nyanggakeun ieu piunjuk ka tuan Besar, lantaran aturan pamarentahan tanah Priangan bakal dirobah, disebutna “Preanger Reorganisatie” atawa “aturan baru robahan tanah Priangan”. Nya dina tanggal 31 Juli 1866 di kota Bandung, nu ku bisluit tanggal 7 Augustus 1864.

Stbl. No.144, dijadikeun dayeuh Karesidenan Priangan, aya kumpulan sakabeh Bupati tanah Priangan, ngabadamikeun “robahan Aturan baru Priangan” tea, nu diluluguan ku tuan Ideler O. van Rees, dibantu ku Secretarisna tuan D.W. Schiff, sarta diluuhan ku tuan Residen Priangan harita tuan C. Van der Moore, ngamupakatkeun hal aturan baru robahan pamarentah tanah Priangan, ieu kumpulan disebutna dina basa Walanda : “Preangerbestuursrweorganisatie-conferentie”.

Tuan Ideler O. Van Rees nu jumeneng Komisaris Gouveernement tina hal ieu, ku pamarentah Agung di batawi diutus ka Priangan, calikna di Sumedang, ngumisi jeung prakna midamel robahna pamarentahan.

Para Bupati Priangan nu ngaluuhan ieu kumpulan di Bandung, nurutkeun sepuhna dina kapangkatan Bupati, nyaeta :

1.  Raden Adipati Soeria Nata Kosoema, Bupati Limbangan.

2.  Raden Adipati Soeria Koesoema Adinata, Bupati Sumedang.

3.  Raden Adipati Wira Natakoesoemah, Bupati Bandung.

4.  Raden Tumenggung Wira Tanoe Baja, Bupati Sukapura.

5.  Raden Tumenggung Prawiradiredja, Bupati Cianjur.

Dina pegempungan ieu mimiti tuan Ideler minangka bubukana, nyarioskeun heula maksud ieu kumpulan, erek ngaganti aturan paparentahan urang pribumi di sakuliah tanah priangan. Ti dinya terus nerangkeun seajarah Tanah priangan di jaman kumawula ka Mataram sarta tina hal angkatan Bupati-wadana nu katelah Dipati Ukur.

Kauntungan tina cuke, diganti ku gajih tetep; saban taun para Regen nampi f.20000,- dibayar bulanan, ditambah ku personeel-toelage (sumbangan pikeun pagawe) f.24000,-jumlah f.44000,- sewang  pikeun Regen Cianjur, Bandung jeung Sumedang.  Regent Sukapura jeung Limbangan ngan nampi gajih bae gedena saban taun f.20000,- sewang. Ditambah deui ku kauntungan tina ladang kopi Nagara dina aprekin.

Kauntungan kopi pikeun Bupati Cianjur jeung Sumedang  teu meunang leuwih ti f.30000,- sewang; Regent Bandung teu meunang leuwih ti f.82000,- Limbangan ulah leuwih ti f.10000,- pikeun Regent Sukapura ulah leuwih ti f.6000,- dina sataun.

Sagala rupa aturan baru dijalankeun sarta diatur ku Staatsblad taun 1870 No. 121, 122, 123, 124. Sakabeh pagawe Nagara nampa deui angkatan anyar: Patih-patih jeung Onderkolektor –onderkolektor ku  bisluit Gupernemen tanggal 21 April 1871M, Jaksa-jaksa jeung Wadana-wadana sa Priangan ku bisluit Gupernemen tanggal 20 Juni 1871.

Sakabeh Bupati Priangan pada nampi “tevredenheidsbetuiging” ti Gubernur Jendral (surat tawis suka). Bupati Sumedang nampi gelaran Pangeran, ari Bupati Bandung nampi Bintang Nederland, nu disebut Ridder in de Ordevan den Nederlandschen Leeuw (Bintang Leo), nu matak tug nepi ka ayeuna nelahna : Dalem Bintang Bandung. Itu nugraha-nugraha diatur ku bisluit Gupernemen 11 Juni 1871.

Sareres Reorganisasi pamarentahan tanah Priangan, ieu, karesidenan Priangan dibagi 9 apdeling nu diparentah ku Asisten residen. Eta apdeling-apdeling teh aya nu ngahiji jeung kabupaten, aya nu diheuyeuk ku Patih-apdeling (Zelfstandige-Patih).  Harkat jeung kakawasaan nu jadi regen ku ieu aturan anyar, kacida nyirorotna, wewengkon bawahan ngurangan, sabab Patih-apdeling saterangna dina ngaheuyeuk nagara teu kabawah ku anu jadi Bupati anu tadina ngawengku eta apdeling anyar. 

Kakawasaan marentah pindah ka anu jadi Asisten residen. Eta nu 9 apdeling teh nyaeta :

• Apdelng Bandung (kabupaten Bandung) dayeuhna Bandung : Bupatina Raden Adipati Wira nata Koesoema (angkatan bisluit tanggal 27 Juli 1846) jujuluk Raden Tumenggung Kartanagara ku Gouvernement besluit (G.B.), 29  Augustus 1846 jenengan Raden Tumenggung Soeria Karta Adiningrat, sarta ku G.B. 5 Juli 1857 nampi gelaran Adipati jujuluk Raden Adipati Soeriakarta Adiningrat, ku G.B. 25 Augustus 1857 gentos jenengan jujuluk Raden Adipati Wiranata Koesoemah, ku Firman Sri Maha Raja Nederland (Koninklijk besluit –K.B.) 7 Augustus 1871 : Ridder in de Orde van den Nederlandschen Leeuw. Patih Kabupaten Bandung Raden Rangga Koesoemadilaga.

• Apdeling Cicalengka, Patihna Raden Demang Wiradikoesoema, dayeuhna Cicalengka.

• Apdeling Cianjur (kabupaten Cianjur): Bupatina Raden Tumenggung Prawiradiredja (angkatan G.B. 24 Augustus 1864), ngagentos rama Raden Adipati Aria Koesoema Ningrat, dayeuhna Cianjur. Patihna Raden Aria Wiriadiredja.

• Apdeling Sukabumi: Patihna  Raden Rangga Wangsaredja, Dayeuhna Sukabumi.

• Apdeling Limbangan (kabupaten Limbangan) dayeuhna Garut: Bupatina Raden Adipati Soeria Nata Koesoema, ku G.B.8 November 1852 jadi Raden Adipati Wira Tanoe datar, ku bisluit (A.D.) 29 Maart 1853 dilandi jadi Raden Adipati Soeria Nata Koesoema. Patihna Raden Rangga Adiwidjaja.

• Apdeling Sukapura (kabupaten Sukapura), dayeuhna Manonjaya: Bupatina Raden Tumenggung Wira Tanoe Baja IV, angkatan G.B. 15 Augustus 1855, mantu Bupati Sumedang Pangeran Soeria Koesoema Adinata. Patihna Raden Rangga Danoekoesoema.

• Apdeling Sukapura-jkolot, Patihna Raden Prawirakoesoema (Putra Hup-panghulu Limbangan: Raden Haji Moehamad Moesa), dayeuhna Mangunreja.

• Apdeling Sumedang (kabupaten Sumedang), dayeuhna Sumedang : Bupatina Pangeran Soeria Koesoema Adinata. Patihna Raden Demang Satjadipradja.

• Apdeling Tasikmalaya: patihna Raden Rangga Somanagara putra cikal Bupati Sumedang.

Ari distrik-distrik kabupaten Sumedang dina taun 1871 M, nyaeta : 

1. Tanjungsari 

2. Sumedang(kota), 

3. Darmaraja, 

4. Cibeureum, 

5. Conggeang, 

6. Darmawangi; legana wewengkon Kabupaten nepi ka ayeuna jigana tetep wae. (nu 4. Patih-lulurah).

Hanca ka bagean 5 (Tamat)